Act 27 | MYW | STEP | Ikaleiwags kid bikayabem, baka̱kuk, bakan Ita̱liy, isekes takalikay nawotet va̱gan bikaymates Pawl siney tasiwuns deil mwasanin. Takalikay towen yagan Yuliyas. Natakanaviys nisesus. Meivek-wan tasiyas Ogoustos inabod.

Acts 27

Ikuks silma̱nin Lom

1 Ikaleiwags kid bikayabem, baka̱kuk, bakan Ita̱liy, isekes takalikay nawotet va̱gan bikaymates Pawl siney tasiwuns deil mwasanin. Takalikay towen yagan Yuliyas. Natakanaviys nisesus. Meivek-wan tasiyas Ogoustos inabod.

2 Ka̱touw wag kaytan, meinoy neim Adilamiteim bein ven wunsiyas Esiy wakawalaw; simey ka̱kuk Alistak, gum-Masidoniy teitan, naven Tesalonik.

3 Neiyam nen mo ka̱lug Sidon. Peinan takalikay towen isiwa̱youb, itam waseg Pawl va̱gan kid binek taliven nisesus ven towen, bimasis, asbwabwal towen.

4 Neiyam nen mo ka̱kuk Sidon, kasawl. Peinan yag kalbaleb ka̱noy wangwanan sim towen Saypilos.

5 Wankuyeim ka̱kuk kadoupouy awasas avakaein walasin ven yagan Silisiy o Pampiliy, mo ka̱lug Mayl, wawnuwan ven avakaein Lisiy.

6 Ven Mayl waseg matakalikay iban min-Aleksanidel siwag akitan, mo ka̱tow wag akiwen waseg, peinan kid bein Ita̱liy.

7 Singaya youviy to naka̱kuk; peinan yag meinoy neim wamitem; yam babaw ikous, mo ka̱lug Nidas. Igaw yag nitotow wamitem, mapuna kayawatein kan wangwanan sim yagan Kilit waseg, kan kadounip silbunun yagan Salamon.

8 Singay keikay to nakadavayal wadadan ven, nakan ee... mo ka̱lug wamunon, yagan Munon Bwanabwein, kadiyakusan ven yagan Lasey.

9 Bo kalasibwen yam mwasanin nein wankuyeim, peinan yag igeg, o bo ikous yam towen min-Yudiy yakamey kapsapos, bo tutan yag avakaein bisilamaw; mapuna Pawl idibakes tasiyas; ilana, “Tawaw, bweina bitayeiwas munon towen waseg; kukin bitakuks, adok bukuyamkwanes kaydod o wag, o ya̱kids babaw adok bitamta̱mats.”

11 Tage taginiwag son takavaveis ilansa, “Munon towen kalbaleb; bweina bitadokons; kukin bitalugs kweitan ven, bo bwein.” Takalikay iligen asilivan tasiyas, ipiyev Pawl anilivan. Tabebaws-wan sivines beikuks, bidokons kid bineis munon yagan Piniks, mo bakayeiwas munon towen waseg.

Piniks wawnuwan sim to Kilit; munon towen wadon isekew wa̱yals, awasas-nen isekew wayavat.

Kalouvat bwaw avakaein

13 Yag yals mo iyagil, idokes bweina bakadavayal bakan Piniks, mo ikawes lon, ka̱kuk kadavayala ven Kilit wadadan.

14 Yag mo itet in wabomat, meinoy neim waven, singaya tawtoun, mamagina sinka̱wein!

15 Ta-ma̱wan baka̱kuk peinan yag meinoy neim wamtem, singay avakaein, mo mweg kweitan kakit ka̱kuk mo isigogonem oko wabwanit.

16 Kan wangwanan sim kakit yagan Kilod, mawotet singay keikay waseg kakatimwen kewow, in wakunuwatan wag, kayawen.

17 Ikous, ikawes yiwayon, mo isays wag. Aspwa̱yat wag kid bitul wakunabub yagan Silitus, mapuna ka̱lug, mo iyalaves.

18 Neiyam nen igaw itotow yag, ilaves kaydod in wabwanit.

19 Neiyam nen mo ikawes wuliyoug-wan wag, ilaves in wabwanit.

20 Yam babaw libgagay ivag; nag kakin ka̱las, nag kakin wutun, yag singay avakaein itotow. Kadoki bo bakamta̱mat.

21 Yam babaw waseg, nag kakamkwam kan. Kweitan yam Pawl mo itamanaw wamitem; ilana, “Tawaw, kadiloka bukuliganes aygag kweiboug; bitayeiwas ven Kilit bo bwein; tut towen bo tayagages, bo tayamkwanes youda babaw.

22 “Tage tut towen awoum beivag amipwa̱yat, peinan nag bitamta̱mats; nag. Misinaka bitayamkwanes wag.

23 “Yey atapwa̱loul Yowbad waseg. Boug waseg gunaYowbad nataka̱yob imekeig, ilana, ‘O Pawl, awoum beivag ampwa̱yat; bo bukunek Sisal. O peinan kwanow Yowbad aygan, bo itam simwey tasiyas tababaws-wan, bo bikatinabweimiy.’

25 “Kadilok beibwein amnamiy, peinan animis Yowbad; bo bikamat ma̱wana nilivnek. Dawag gog bo bibilag wa̱sim.”

27 Akweiy wik iyalavem wabwanit towen yagan Ediliy. Watapwan boug tasiyas wunataw mo idokes ven kid kadiyakusa nises.

28 Mo bitakwanes bwanit ama̱wan vayovan; mo ivinis ova̱vin. Ova̱nim, ova̱nim, ova̱nim, ova̱nim; e, mo imlavag sinawey. Wankuyeim vayuwein mo itakwanes, mo imlavag sinawatan ova̱nim vayovan bwanit towen.

29 Aspwa̱yat bakan wadakul, mata ge igulek wag, mo ilaves lon walivas wawawun wag; sivines kid ga-iyam.

30 Wunataw inibwis kewow, ilansa, “Lon mwasanin bakanow wadabwen wag bakalev;” iyaweids gog, sivines kid bikala̱vis, bisawls kid bilisawemas.

31 Pawl mo idibek takalikay sen natakanaviys; ilana, “Kukin tasiyas bilisaweids, bo bitamta̱mats babaw ya̱kids. Kukin bisesus, bo bwein.”

32 Mapuna takanaviys tasiyas mo ibwabwes vatulen kewow, ikalouw in wa̱yol, iyetuwen.

33 Wankuyeim kakita beiyam. Pawl mo iguyem va̱gan baka̱kam; ilana, “Yam sinawatan kweivas nukusesus, ikubukub nuwamiy, nag kukwams. Kadiloka kukwams va̱gan gog biyamoveimiy; nag aveiyag bivag, nag; bwein-wan bitasesus.”

35 Ilivan ikous, mo ikow bled, ikalin nuwan Yowbad waseg, initoug wamtem meiveka gamag yakamey, bled ikiv, mo isilamaw ikam.

36 Amnem mo ibwein babaw yakamey, mo ka̱kam.

37 Meiveka yakamey wag makaywen adagan, lakatuy sinawanim sinawey teinim tatanok gamag.

38 Ka̱kam, kakamuweip, mo kalev kan, in wa̱yol va̱gan kid wag bikayay.

Ikatugulek wag

39 Iyam nen ga̱boug, nag teitan gamag iwtus ven towen, tage kaban awasas kakit alekel kakit nises; tasiyas wunataws idokes biyokons kid beikuks va̱gan wag bein wanuwan, mo bibilag wag.

40 Mapuna ibwabwes yiwayon, lon kalisow wa̱yol; kweiboug niyawanis avaveis naman va̱gan awoum bigogewn kid, tut towen mo ilikus vitulen avaveis va̱gan bigogewn; kanagon mo isenas, mo ka̱kuk silma̱nin kawalaw towen.

41 Ka̱kuk ee... wag mo itul kunabub waseg, dabwen ibilag, kaysay iwaway wag wawawun, mo ikatagulek.

42 Takanaviys idokes bweina bikatimates tasiyas tasiwuns deil, mata igegays ge iga̱lags mo bisawls.

43 Tage takalikay towen sivinan biyamov Pawl, mapuna isilbwed asisinap; ilana, “Tasiyas kalisiy ikakins gegay kadiloka bikaspepel bineis wa̱yol bigegays bimgwayemas bineis wanakaew. Yakamey wankuyeim kaypap waseg mo baka̱gay bakan wanakaew.”

E, ma̱wan sona mwamovem meiveka yakamey kan wanakaew mo kasap waven.